الخميس، أغسطس 06، 2009

إيه إنتي فاكراني الريس ؟؟


 
ربما نسمع قريبا جدا هذه العبارة من شاب صغير تعود على سماع الأفلام العربية وقنوات التلفزيون الأرضية عندما تتهمه أمه بأنه لا يعلم شيئا عن ما يحدث حوله ..
ما تسعى إليه الأوساط الإعلامية المصرية أو ولنقل الحكومية إلى تبرير الأفعال التي تحدث في مصر من أن الرئيس لا يعلم شيئا مما يحدث لأبنائه – أقصد المصريين ليس جمال أو علاء -  أمر لافت للنظر والذي بدأ منذ عهد عبد الناصر حينما شكك الكثيرون في زعامة عبد الناصر – وهذا بعد وفاته – لأنه حول السجن الحربي لملتقى لكل من عارضه وخالفه الرأي ، وهنا خرج علينا الناصريون ليثبتوا كذب هذا الادعاء وحتى يخرجوا من هذه المحنة قالوا أن ناصر لم يكن يعلم ما يحدث في غياهب السجون وأنه لو علم لرفض السماح بحدوث مثل هذه التجاوزات ..
الآن نرى نفس الأمور تتكرر .. الإعلام المصري يسعى دائما لتجميل صورة مبارك وأنه لا يعلم أدنى شيء عن تلك التجاوزات في بلاده ، وأنه حتى لم يرتق إلى حد آخر من يعلم ، وما نراه يتكرر في أفلامنا المصرية أمثال (جواز بقرار جمهوري )(طباخ الريس ) أو (ظاظا) – مع أن الأخير لم يوضح الأمر علنيا – يجسد هذا الأمر ويحاول إظهار الرئيس في صورة الحمل الوديع ..
فبفرضية أن الأمر جدي وأنه – أي مبارك – لا يعلم ما يحدث في بلاده وفي الدولة التي يحكمها لمدة قاربت على الثلاثين عاما وأنه يتابع أحوال الوطن عن طريق التقارير فهو عذر أقبح من ذنب فهذا يعني أن الرئيس مثل الأطرش في الزفة ، وأنه مساق من قبل مجموعة من اللصوص الذين ينشهون لحم البلد نهشا .. إنه أمر يدل على أن سيادته لا يصلح أن يحكم أي دولة ولا حتى حكم كفر مصلحة ..!!
أما بافتراض بأنه يعلم كل الأمور عن دولته المنحوسة – عفوا – المحروسة يؤكد بأنه جبار متكبر فرعون هذا الزمان .. وهذه الفرضية أنا شخصيا مقتنع بها .. فالوسائل الحالية تمكن سيادته من معرفة دبة النملة في بلده ..
ما زالت تلك الجملة التي قالتها يسرا للنجم أحمد زكي في فيلم معالي الوزير تثبت صحة برهاني حينما قالت : " مصر ما يستخباش فيها سر أكتر من سنة " فهل يعقل لدولة ما يستخباش فيها سر أكثر من سنة أن يستخبى فيها العلن ثلاثون سنة !!
أعلم أن ما أقوله الآن قد ينهي مستقبلي – الذي لم تتضح معالمه بعد – وأنه يجب على الحكومة الزج بي في السجون ومحاكمتي بتهمة الإهانة لشخص الرئيس .. مع أنهم لو أرادوا اعتقالي فالأحرى أن يعتقلوا الإعلام المصري ..
فأنا أتهم الرئيس بأنه جبار وهم يتهمونه بأنه حمار !!

هناك 24 تعليقًا:

Anas M.Refa't يقول...

ايه الحلاوة دي يا مصعب

توبيك جامد جدا ،،، بجد تسلم ايديك لو انت الي كاتبها

فعلا كتابة تمام ، وحلو الختام الي انت عامله

برااااااااااااافو بجد

همسة يقول...

بالنسبة للبوست فهو بدون مجاملة روعة وطريقة العرض أجمل .بس انت يا مصعب لسة فى عز شبابك أبعد يابنى عن السياسة والحاجات دى خليك جنب الحيط أحسنلك ولو لازم الامر ممكن تمشى جوة الحيط نفسه.
أبدعت حقا
تحياتى

المجاهد الصغير يقول...

السلام عليكم
جزاك الله خيرا على هذا العرض وعلى هذه الحقيقه التى تقولها الناس وهى رئوسها فى التراب حتى لا يسمعهم احدا
وفقك الله لما يحبه ويرضاه
اللهم بلغنا رمضان
كل سنه وانتم طيبين
اللهم انصر الا سلام والمسلمين وارفع رايه الحق والدين

عاشقة الأحزان يقول...

ايه السياسه دى ياقمر


مابلاش خلينا جنب لحيطه احسن احنا مش قدهم

هههههههههههههههههههه

بجد والله بوست قمور قووى وعسل

وطريقة الكتابه تحفه

تحياتى
انوسه

خالد فوده - Khaled fouda يقول...

رائع
بجد انا كتبت موضوع مشابهه لده تماما .. باستثناء الختام الرائع منك طبعا
ولذلك لن أنشره .. حتي لايتبين نقاط الضعف عندي هههههههه

الشاعر الحزين يقول...

تصفيق حاااااااااااااااااد

بجد هايل وفى منتهى الروعه يا مصعب بجد

ايه يا عم الكلام الجامد ده ؟

بس خلاص بقى حاول تشوفلك سرير تستخبى تحته لأن اللى جاى الله أعلم بيه

ههههههههههههههههههه

بهرج طبعا

دا أنا عايزك تاخد الطريق ده ومتبعدش عنه أبدا

بجد فكرتنى بالأستاذ إبراهيم عيسى

ربنا يكرمك

الى الأمام يا أستاذ مصعب

دمت بالخير

المشخبطاتى يقول...

وطوال مدة حكم الرئيس كانت يجب التضحية دائماً بأحد رجاله خاصة من أحبه الناس أو سطع نجمه زى كمال الشاذلى مثلاً أو بقى حرامى كبير أوى وريحته طلعت وماينفعش يطول عن كده..

أما الرئيس فلايجرؤ أن يقترب منه أحد وإن تجرأ فالنتيجة معروفة...زى أيمن نور كده..
.................................

ماعرفش إيه علاقة اللى أنا كاتبه بالموضوع..بس أهو على الرئيس وخلاص.

سمسم يقول...

السلام عليكم
عذر اقبح من ذنب
هي كده فعلا
هو يا جبار يا حمار
وممكن الاتنين سوا
ربنا ياخدو قريب
وانا مش خايفة عليك لانك بجد راجل
الي يقتل الخوف جواه يبقى راجل بجد
تحياتي

ليس فقيرا من يحب يقول...

السلام عليكم

ايه الجمال ده يا مصعب

بوست فى الجون

اللؤلؤة يقول...

مصعب صلاح
السلام عليكم
تدوينة موفقة
ورآى صريح
فدام قلمك
وسلمت يداك
ودمت بكل الخير

أم مالك يقول...

عارف يامصعب
انا لما بنقرأ مواضعيك
برجع تانى لملف التعريف بيك فى المدونة
مش مصدقة اللى مكتوب فى خانة السن
مش حقول غير بسم الله ماشاء الله
ربنا ينور عقول شبابنا
اوعى تختفى بعد هذا البوست ليزيد
قلقنا عليك
يعنى بعد البوست ده بالذات لازم تظهر بسرعة ولو اختفيت حيكون
خير اللهم اجعله خير
ربنا يحفظك يامصعب
تحياتى

A.SAMIR يقول...

نفس اللي كنت انتقد به دراويش و مجاذيب عبد الناصر
فهم يقولون انه لم يكن يعلم
و هي مصيبة افدح مما لو كان على علم بمجازر و مصائب عصره
احنا من الاخر كدة منكوبين بحكامنا
بس السؤال اللي بيطرح نفسه
بما ان الشعوب تستحق حكامها
هل نستحق نحن هؤلاء الحكام؟

العصفورة يقول...

السلام عليكم
موضوع جميل
خالص تقديرى

م/محمود فوزى يقول...

السلام عليكم
مصعب باشا
اتفق معاك فى كثير من اللى قلته
بغض النظر عن الاستعانه بكلام على لسان يسرا
ربنا يهدينا ويهديها
وكمان اتحفظ على بعض المصطلحات


مين قال ان عبدالناصراو مبارك لا يعرفوا اللى بيحصل واللى حصل

غريبه ازاى باه انهم رؤساء
رحم الله الفاروق عمر بن الخطاب رضى الله عنه
عندما قال ما معناه
اخشى لوعثرت دابه فى العراق لسئلت عنها لم لم تمهد لها الطريق يا عمر
وايضا
رحم الله امرء اهدي الي عيوبي

نرجع للوضع الحالى
يعنى لما يطلع مثلا الرئيس من كام يوم فى موضوع التيفود فى القليوبيه
طيب ما عرف اهه ان فيه تيفود انتشر بسبب وجود مياه المجارى فى مياه الشرب
وده بعد 28 سنه حكم
وقبل كده حاجات زى دي
مايفكرش مثلا ان فيه مشكله فى البلد

انا فعلا اتغظت جدا من فيلم طباخ الريس وجوازبقرار جمهورى لانهم مطلعين الريس ملاك
طيب ماهو بشر زينا
وكمان فيه حاجه انت كلامك سليم
هو اذا كان كده وهو ميعرفش اى حاجه فى اى حاجه
طيب ازاى هو الريس


ربنا يرحمنا

حـــلـــم كــــان يقول...

جاااااااااامد يامصعب

بس اقولك نصحيه مامتى ربنا يخليهاواستاذى
قالو لياقبل مادخل الامتحانات بالتحديد امتحان التاريخ وانا بذاكر سوال بيقول ان محمد حسنى مبارك حقق اهداف ثوره 23 يوليو وكانت الاجابه عباره عن شويه نفاق

ان مكتبش من دماغى واحفظ السوال
واروح اكتبه عشان ميحصلش مشاكل
وفعلا جالى ف الامتحان

فنصحيه منى وانت داخل ع ثانويه عامه
خد بالك من الحته دى

osama44 يقول...

مصعب
بوست رائع من قلم رائع
اشكرك عليه
وانا مع الافتراض الثانى انى الريس عارف دبة النمله وانه يعلم تجاوزات حكومته
اما الافتراض الاول فهو فى غاية الساذجه
لانه وبصراحه لو كان الافتراض اللاول على ماكنش عرف يحكم كفر مصلحه شهر
مش يحكم بلد زى مصر تلاتيين سنه اويزيد
اشكرك بجد بوست روعه

طـــائر الليــــل الحـــــزين يقول...

مصعب
البوست فعلا جميل وبيناقش كارثة بنعانى منها كلنا
تسلم ايدك
وكل سنة وانت طيب

لقد خلقنا الله احرارا يقول...

اصلنا يامصعب تربية فراعنة
احمد ربنا
دلوقت فرعون طيب ومش بيعرف الحاجات الوحشة
لكن زمان فرعون كان ابن الاله
فاهم يعنى ايه ابن الاله
ده حتى فرعون موسى كان نكتة
قالنا انا ربكم الاعلى

باختصار
ربنا قال على فرعون موسى
مامعناه
استخف قومه فاطاعوه

صفــــــاء يقول...

عشان يتبرئو من دماء الناس وفقرهم وعجزهم وقله حيلتهم
بينكرو المعرفه
وانه لو كان يعرف مكنش وافق
لو علمت ما جرى فتلك مصيبه ولو لم تعلم فالمصيبه اعظم
تحياتى لك

ريمان يقول...

مش معقول يا مصعب

مش مصدقه انك انت اللى كتبت الكلام ده

عرضك جميل للموضوع وطرحته بشكل سياسى كمان




تحياتى ليك ولقلمك

انا حاسه انك كاتب كبير مش عندك 15 سنه

حياتى نغم يقول...

السلام عليكم / للأسف عندك حق فى كل كلمه .
كان فى زمان سلطان أطرش أعلن فى البلد ان من له مظلمه يرتدى لون بعينه فكان ينزل يمشى فى البلاد ليرى من له مظلمه حكايه سمعتها قديما ويا ليتها تعود .
فى رعاية الله .

ريمان يقول...

السلام عليكم


مصعب

استغربت اوى لتعليقك عندى كرد على تعليقى عندك

مش معنى انى بقولك انك كاتب كبير وكتاباتك بتدل على انك سنك مش 15 او 16 سنه انك كده بتكدب

لاء انا برفع من شأنك وبوضح لك اعجابى بكتاباتك وباسلوبك


ده اعجاب منى


مش متصوره انك ممكن تكون فهمت انى اقصد اقولك انك بتكدب


لا لو كنت فكرت كده بجد هزعل

مخبر قمل دولة يقول...

مصعب .. انا شايف انك احسن من ابراهيم عيسى بكتير هنا .. مقالك دا من اروع ما قرأت بخصوص موضوع ( الريس مايعرفش )
احييك بشدة على الموضوع كله والخاتمة مخصوص

مخبر قمل دولة يقول...

على فكرة .. عجبتني اوي حتة "فهل يعقل لدولة ما يستخباش فيها سر أكثر من سنة أن يستخبى فيها العلن ثلاثون سنة !