الأربعاء، أبريل 08، 2009

هل استحق هذا التاج ؟


تم ارسال هذا التاج من المدونة الأستاذة نهاد صاحبة مدونة without identity....
*********
اسمك....؟
مصعب صلاح
سنك...؟
15 سنة وفي 18/6 الجاي هاكمل 16 سنة
مجال دراستك ؟
اولي ثانوية عامة والسنة الجاية هادخل جحيم الثانوية العامة
اسم مدونتك ..؟
وحي القلم ، اسم عام مش بيعبر عن حاجة خاصة
الصوره الرمزيه لمدونتك بتعبر عن ايه ...؟
صورتي الشخصية ، بتعبر عني طبعا
هل فكرت في اغلاق المدونه ؟ والسبب ..؟
حصل ، بس كنت مخنوق وحسيت ان كتباتي ملهاش لازمة ، لكن تراجعت سريعا
ايه رد فعلك لو حد قل ادبه عليك في تعليق ...؟
محلصش معايا موقف زي كده قبل كده بس لو حصل وكانت الاهانة شخصية مش مشكلة لكن لو هتمس شخص تاني هاحذف التعلبق
اسوء مدونه...؟
مفيش أي مدونة ينفع اقول عليه سيئة ، صاحبها حر فيها
هيحصل ايه للايميل بتاعك لما تموت...؟
لو الياهو شاله هو حر ، مش فارق معايا هيروح فين
اديت الباسوورد بتاعك لحد ...؟
القديم اديته لأخويا الكبير ، انما الجديد محدش يعرفه غيري ، مفيش حد يهتم انه يعرف الباسورد بتاعي
السفر بالنسبالك ايه ...؟
حلم من أحلامي ، نفسي الف العالم كله
المود بتاعك ؟
في الغالب أنا باعتبر الوقت اللي كنت في متضايق منه مش من عمري ، يعني في الغالب أنا مبسوط
بتعمل ايه في وقت فراغك..؟
يعني ، باتمشى شوية ، باقعد مع نفسي ، مش حاجة ثابتة
الأكلة المفضلة
أي أكل حلو ماعدا الفول طبعا ، أنا مش عارف بيأكلوا الفول ازاي ؟!
الصفات اللي ورثتها عن والدك.؟
صفات كتيييييير جدا ، أنا ممكن تقولوا كده نسخة مصغرة من أبويا
الصفات اللي ورثتها عن والدتك ..؟
قلبها الكبير اللي لا يعرف حقد ولا كره لحد
اكتر ست حاجات بتكرهها...؟
1.     انحطاط التفكير
2.     الكذب والنفاق
3.     الناس اللي عايشه لنفسها
4.     السلبية
5.     اليأس
6.     الظلم  
اكتر ست حاجات بتحبها...؟
1.     القراءة & الكتابة
2.     أصحابي
3.     الوحدة
4.     التأمل والفلسفة
5.     المعرفة
6.     الحب في الله
شخصيتك نوعها ايه....؟
مرحة ، انطوائية ، صريحة ، غامضة ، رومانسية حبتين
لماذا دخلت عالم التدوين ...؟
لأني باعشق الكتابة ، والتدوين أفضل مكان اكتب فيه
اجمل كلمه اتقالت في وصف مدونتك.....؟
 مادام حد قرر انه يكتب تعليق عندي فهو دا أجمل كلام يتقالي
أهمية التعليق بالنسبة ليك ؟
بيكمل البوست ، بيديني دافعة اني أكتب احسن من الاول ، بيصحح لي بعض الاخطاء
احسن بوست كتبته ....؟
كلهم بالنسبة لي حلوين ، بس أفضلهم بوست بعنوان ( معاتبة قلم )
افضل بوست قرأته ...؟
البوست اللي موجود في أي مدونة أنا ضايفها عندي في الرايدر
الشغل بالنسبالك ايه ؟
نفسي الايام تجري علشان اشتغل صحفي ، لأني باعشق المهنة دي ، أما المدرسة فهي بالنسبة لي تقضية واجب
النت بالنسبالك ايه ؟
حياتي التانية
تمرر التاج لمين...؟
كان نفسي أعطيه لأحمد بدر الدين صاحب مدونة عمود نور ،
بس عنده امتحانات ثانوية أزهرية الله يكون في عونه – ياريت تدعوا له –
علشان كده اللي عايز ياخد التاج ياخده بس يدفع تمنه
تحياتي

هناك 25 تعليقًا:

الشاعر الحزين يقول...

أووووووووول تعليق

شفت بقى يا سيدى
أدينى فوزت بهدفين

الهدف الأول

هو أول تعليق

والهدف التانى هو أول زياره لمدونتك الجميله

بس أنا مش هفسرلك شخصيتك لأنك فسرتها بنفسك

بجد ردودك واجاباتك جميله ونموزجيه

ويارب يحقق أمينتك وتبقى صحفى قد الدنيا

خالص تحياتى لك

♥..~*شـــوشـــو هـــانــم*~..♥ يقول...

السلام عليكم ورحمة الله وبركاته

إجاباتك عالتاج جميلة ودمها خفيف في كذا اجابة كدا ضحكتني خاصة بتاعة الفول دي موتتني من الضحك..
معلش بقى مش هعرف احلل شخصيتك زي ماانت حللت شخصيتي لاني مبعرفش..

بس عجبني كمان في شخصية حضرتك انك دايما مبسوط. ربنا يبسطك على طول..
ربنا يوفقك يارب ويعينا على جحيم الثانوية العامة اللي هندخله السنة الجاية ان شاء الله
ويارب تبقي صحفي كبير قد الدنيا ونقرالك كتب في المستقبل ان شاء الله

دمت كما تحب..
تحيتي..

احمد بدر الدين يقول...

حبيبى جدا ( ليس مجرد مصطلح ) اعنى من قلبى
..
لا اعلق عند احد هذة الايام تعرف المحنة
..
احببت ان تعرف انى متابع لك ... وخصوصا انت
..
ان تذكرنى على صفحات مدونتك .. هذا يعنى لى ما لا يعبر عنة الكلام .. ان تبرهن انى ما زلت فى ذاكرتك ..لم تذكر احدا الا انا .. وانا منقطع اصلا عن عالمى الحبيب
..
ليت لى النجوم عقود مدح فأنظمها شعرا ونثرا
..
يطول الكلام واختصارا ( احبك فى اللة )
لا تنسانى من دعائك

جوجو يقول...

السلام عليكم

جميلة اوى اجباتك على التاج

ربنا يحققلك اللى بتتمناه وتدخل اعلام
ان شاء الله

تحياتى

Hossam يقول...

Hello
مدنتك جميلة وعلى فكرة انا ابتدبت تدوين وانا ادك
تحياتى لك ولمدونتك الجميلة
سلام

خالد فوده - Khaled fouda يقول...

انت ازاي تتريق علي الفول واللي بياكللوه
مش عيب
ده شعب مصر كله بياكله

محاولة لكسر الصمت يقول...

زيارتي الأولى..
سأقول شيئا ربما يضايقك في البداية ولكن ما لفت نظري في مدونتك هو الرقم المكتوب في خانة العمر (15)
..لا أقلل من قيمة من هم في مثل عمرك, لكنني أشعر بالعجب الممزوج بالفخر كلما وجدت مدونة لمن هم في هذه المرحلة العمرية, شيئ يمنحني أملا في أن القادم أفضل, بكم بإذن الله...
أما عن إجابات على (التاج) فقد زادت الأمل أملا..
تحياتي.......

ريمان يقول...

السلام عليكم


انا سعيده جدا بمرعرفتك يا مصعب

وكمان سعيده اننا على تواصل

وسعيده اكتر بالتاج ده عشان اول مره ادخل عندك والاقى تاج يعرفنى بشخصيتك

بس بقولك ايه

اوعى تفكر انك تقفل المدونه اكيد مهما اللى بتكتبه ليه اهيمه

وان شاء الله تجمع اصحاب كتير من المدونني

وانا طبعا منهم

تحياتى ليك

أبو عبيدة يقول...

طبعا أنت تستحق التاااااااااج ده وأحسن منه كمان يا حبيبي قلبي
أخوك / أبو عبيدة

Beram ElMasry يقول...

الاخ العزيز . مصعب صلاح
السلام عليكم ورحمة الله وبركاته
شكراً أخى مصعب وبارك الله فيك وأرجو أن تداوم على أسعادى بزيارتك ولا تحرمنى من جميل تعليقاتك
لك تحياتى والسلام ، ولا سلام مع اليهود

(Joudy) يقول...

بصراحة مدونتك جميلة جدا وموهبتك رائعة بالنسبة لسنك والمود اللى انت داخل عليه ثانوية عامة وكده ربنا يديم عليك موهبتك

تقبل مرورى

صوت من مصر يقول...

يابنى انت مصعبها على نفسك ليه
كلام مليان كلام كبير وكله لغه عربيه فصحى
اقلع الطربوش وانزل على وحى الارض
لو مكنتش قريبت البوست كنت هقولك ( جميل وبسذاجه جدا )
لكنى بنصحك

Soul.o0o.Whisper يقول...

السلام عليكم و رحمة الله و بركاته

حقيقى اجاباتك هايلة
و رديت بكل تلقائية

و قلت طبيعة شخصيتك
أما بالنسبةلى انا
فحكاية مش باحب الصراحة ...لا

الحكاية انى واخداها لعب :)

انما باحب الصراحة جدا
لانها اقصر الطرق للوصول لهدفك

شكرا ليك
و ربنا يوفقك يارب

ايمان روحي يقول...

السلام عليكم رحمة الله وبركاته
بصراحه اجوبتك بجد خطيييييييييييرة
رغم انوا عمرك 15 بس ماشاءالله عقلك كبيييييييييييير
انا شكلي هبلش اخاف مناللي عمرهم 15
ههههههههههه
لان كل اللي قابلتهم دهيه
بس جد ماشاءالله عليك
وربي يحققلك انياتك بالصحافه
بصراحه ماشاءالله نيالك هتدقدر تدخلها ام انا رغم حلمي فيها مش هقدر لان اهلي رافضين
بس بجد بهنييك
انت انشاء الله الك مستقبل حلوا
دي اول زيارة بس انشاء لله مش هتكون الاخيرة
وهتابع ابداعك المتميز
بالتوفيق
تحيــــاتي

بـــــــــــــــــــــــــــــــــــــــــــــــوها يقول...

بجد المدونة جميلة اوي وكلامك جميل جدا
اخي
ربنا يكرمك ويوفقك
ولا تخاف من الثانوية العامة انا لسه متخرج من جحيمهاالسنة الي فاتت
ربنا معاااااااااااك
اخوك
بوها

حفيدة البنا يقول...

السلام عليكم؛
إجابات جميله ومضحكه وماشاء الله مبسوط على طول ^_^
أنا بردك نفسى أدخل كليه صحافه وإعلام
يالا الله المستعان
وفقكم الله وحقق لكم كل ما تمنيتموه
جزيتم خيراً
أسألكم الدعـــاء

aidy يقول...

اجاباتك جميلة يا مصعب

ويارب يحققلك امنيتك وتبقى صحفى مشهور

اهم حاجة تجتهد عشان ربنا يكافئك بالنجاح والتوفيق

وطبعا تستحق التاج دى مش محتاجة كلام

شخصيتك بجد جميلة يا مصعب اهم حاجة تحافظ عليها كده ومتتغيرش بفعل عوامل الزمن

تحياتى ليك اختك : ـ

نهاد

ঔღঔ نـــوارة ঔღঔ يقول...

اجاباتك عالتاج جميلة وصريحة

تشرفنا بالتعرف عليك

ماشاءالله مدونتك راااائعة جدا

ربنا يوفقك ويحققلك كل احلامك

طـــائر الليــــل الحـــــزين يقول...

مصعب
اجابات جميلة
وفعلا زى ما انا قولت قبل كده
كلامك اكبر من سنك بكتيييييير
ودى حاجة كويسة
تحياااااااااتى

محمد حمدى ميدو يقول...

بسم الله مشاء الله موضوع رائع وتستاهل اكبر من التاج واغلى منة < طقية>

فشكووول يقول...

ازيك يا مصعب
ايه حكاية التاج ده
منتشر بين المدونات
قريته فى اكتر من 10 مدونات
تحياتى

صفــــــاء يقول...

جميل يا مصعب
وعقلك كبير وأفكارك قويه
ربنا ينجيك من جحيم الثانويه العامه
يوفقك ان شاء الله
ونتمنى نشوفك من أكبر كتاب البلد بقى
لأن اكيد الموهبه والعقل دول هيكبرو معاك
تحياتى لك
.

معتز شاهين - باحث تربوي يقول...

الل ينور
اجابات مقنعة وهادية
ويبقى التواصل

بحب كل الناس يقول...

ربنا يوفقك يا غالى ويحقق لك امانيك

بارك الله فيك وأجاباتك جميلة جدا

وسلام عليكم

مصعب صلاح يقول...

الشاعر الحزين
--------
شكرا ع التعليق ومبروك عليك الهدفين

♥♥♥♥♥♥♥♥♥♥♥♥
الشيماء صلاح*shosho*
---
شكرا لحضرتك ع التعليق وربنا يسترها معانا السنة الجاية

♥♥♥♥♥♥♥♥♥♥♥♥
احمد بدر الدين
---
طبعا انت عارف مقدرتك عندي عاملة ازاي .
وانا ايضا اود أن اقول
" احبك في الله "

♥♥♥♥♥♥♥♥♥♥♥♥
جوجو
--
شكرا ع التعليق واتمنى من حضرتك متابعتنا دائما
♥♥♥♥♥♥♥♥♥♥♥♥
Hossam
شكرا لزيارة حضرتك ونتمى مزيدا من الزيارات.
♥♥♥♥♥♥♥♥♥♥♥♥
خالد فوده - Khaled fouda
أنا مش باتريق ع الفول بس أعمل ايه مش بحبه
♥♥♥♥♥♥♥♥♥♥♥♥
محاولة لكسر الصمت
شكرا للزيارة وباذن الله تتكرر والحقيقة ان في كتير جدا ف السن ده يعتبروا مشاريع نجاح
♥♥♥♥♥♥♥♥♥♥♥♥
ريمان
أنا أكثر سعادة بزيارة حضرتك واشكرك للمتابعة
♥♥♥♥♥♥♥♥♥♥♥♥
أبو عبيدة
جزاكم الله خيرا أخي في الله وشكرا على التعليق
♥♥♥♥♥♥♥♥♥♥♥♥
Beram ElMasry
شكرا على تواجدك في مدونتي وبالطبع لا سلام مع اسرائيل وباذن الله هأكون عندك ف المدونة كل ثلاثاء
♥♥♥♥♥♥♥♥♥♥♥♥
(Joudy)
سعيد بزيارة حضرتك وشكرا علي تعليقك
نسألكم الدعاء
♥♥♥♥♥♥♥♥♥♥♥♥
صوت من مصر
على فكرة انا مش مصعبها على نفسي بس باعتبر المدونة جورنالي الشخصي
شكرا لتواجدك معي
♥♥♥♥♥♥♥♥♥♥♥♥
Soul.o0o.Whisper
شكرا للتعليق واتنازلت عن موضوع عدم الصراحة
♥♥♥♥♥♥♥♥♥♥♥♥
ايمان روحي
الحقيقة المدونين اللي في سني كتير واحسن مني كمان
ثبتك الله
♥♥♥♥♥♥♥♥♥♥♥♥
بوها
شكرا لتواجدك وربنا مع كل اللي ف الثانوية
♥♥♥♥♥♥♥♥♥♥♥♥
حفيدة البنا
جزاكم الله خيرا ع التعليق ويارب تحققي امنيتك وتدخلي اعلام
♥♥♥♥♥♥♥♥♥♥♥♥
aidy أو الافضل أقول اختي الكبيرة نهاد
شكرا ع التعليق وهحاول احافظ على شخصيتي
♥♥♥♥♥♥♥♥♥♥♥♥
ঔღঔ نـــوارة ঔღঔ
سعيد بالزيارة ، الصراحة اقرب الطرق للحقيقة
♥♥♥♥♥♥♥♥♥♥♥♥
طـــائر الليــــل الحـــــزين
شكرا ع التعليق والله من ذوقك
♥♥♥♥♥♥♥♥♥♥♥♥
محمد حمدى ميدو
شكرا يا ريس بس أول مرة اعرف ان الطاقية اغلي من التاج
♥♥♥♥♥♥♥♥♥♥♥♥
fashkool
منورني دائما ودا عبارة عن ريبورتاج علشان التعرف ع المدون أكثر
♥♥♥♥♥♥♥♥♥♥♥♥
صفــــــاء
جزاكم الله كل خير ع التعليق
وربنا ينجينا حميعا من الثانوية العامة
♥♥♥♥♥♥♥♥♥♥♥♥
معتز شاهين - باحث تربوي
شكرا ع التعليق ، ويبقى التواصل
♥♥♥♥♥♥♥♥♥♥♥♥
بحب كل الناس
بارك الله فيك وتسعدني دائما زيارتك
♥♥♥♥♥♥♥♥♥♥♥♥
شكر خاص لكل اللي علقوا ع البوست وربنا يديم المحبة