الأحد، أبريل 05، 2009

مدفع الاضراب .......اضرب

حان الان موعد الاضراب حسب التوقيت المحلي لجمهورية مصر العربية

ياترى الاوضاع اللي في مصر راضي عنها ؟ ! ياترى انت مش حاسس بالظلم في البلد دي
ياترى مش نفسك تعبر عن رأيك وتحاول تغير الاوضاع على قد ما تقدر
أكيد طبعا حاسس بيه 
ايدك معانا 
كلنا مضربين
دورك متروحش الشغل , متروحش الجامعة , متروحش المدرسة

ما تفتحش المحل ,ماتفتحش الورشة

بلاش تنزلى السوق , أمتنعى عن الشراء

عايزين مرتبات تعيشنا

عايزين تعليم لأولادنا وشغل للعاطلين

عايزين ما ناخدش على قفانا

عايزين سكن للي عايشين في الشوارع

عايزين مستشفيات تعالجنا ودواء لأطفالنا

عايزين عدل وحق وحرية

عايزين نبنى ونزرع ونصنع

عايزين نحاكم اللى سرقونا وجوعونا وذلونا

عايزين دستور يحمينا ومصر ترجع لينا

مش عايزين محسوبية ولا ضباط بلطجية

مش عايزين رفع أسعار ولا تعذيب فى الاقسام

مش عايزين كلام فى الهوا ولا وعود مزيفة

مش عايزين معونة من أمريكا ولا جات مع أسرائيل



مش عايزين غير حريتنا



عايزين نعبر عن ارادة شعب انتهكت حقوقه قرابة ال30 عام



كلنا لازم نضرب ونعرف الحكومة اننا مش خايفين واننا عارفين حقوقنا كويس


وهنرجها مهما كانت الصعاب



إذا الشعب يوما ً أراد الحياة لابد أن يستجيب القدر
لابــــــــــد لليل أن ينجلى , لابد للقيد أن ينكســـــر

هناك 6 تعليقات:

طـــائر الليــــل الحـــــزين يقول...

يااااااااااه
تفتكر ممكن نقدر ناخد كل ده
والا هيفضل لينا مجرد حلم
تفتكر هيجى علينا يوم نتعامل معاملة ادمية على الاقل
يحسسونا فيه اننا احنا اصحاب البلد دى
نحس اننا بينا حقوق البشر فى اننا نلاقى سكن للى فى الشوارع
وتعاليم كويس والشباب يلقى شغل ويعرف يتجوز
نلقى مواصلات ادمية نعرف نتعامل معاها
نلقى حتى علاج من غير قلق ولا سرقة اعشاء ولا اهمال موظفين
وتحايل مسؤالين
ياه هتفرق معانا كتير قوى تصدق
تحيااااااااااااتى
انت بهرتنى

فشكووول يقول...

ازيك يا مصعب .. تحياتى

قعدت اشوف القنوات الفضائيه عشان اشوف ايه اللى حصل ما لقيتش حاجه تذكر غير خبر صغير فى شريط اخبار الجزيره
يظهر الله اعلم مصرا راحت فى سبات طوييييييييييييييل

تحياتى

♥..~*شـــوشـــو هـــانــم*~..♥ يقول...

السلام عليكم ورحمة الله وبركاته

أولا بعتذر عن التأخير في الزيارة بس الامتحانات الشهرية والمذاكرة

فعلا كلنا كشعب مصري بنتمنى ان كل اللي انت ذكرته دا يتحقق احنا فعلا عايشين في معاناة من ظلم الحكومة
ياخسارة أنا لوقاعدة في مصر كنت اضربت بس للأسف عالعموم انا هعمل اضراب معنوي

انت بجد مبدع ومثقف جدا..

تحياتي لك ولقلمك..
دمت في تألق..

صفــــــاء يقول...

لا سيبك من الحوارات دى
انا كنت فى القاهرة النهاردة والناس أيييييه أمم كدة فوق بعض
ولا أضراب ولا نيله
ومفيش أى حركه سياسيه فى مصر قادرة على تحريك الناس أو أقناعهم بمبادئها أو الموافقه على تحركاتها

.

محمد مارو يقول...

وفشل الاضراب

مصعب صلاح يقول...

استاذة / طـــائر الليــــل الحــــزين
********
ممكن نقدر ناخذ حقنا بس لو احنا عملنا لده
---------
استاذ / fashkool فعلا مصر في سبات طويل
ياريت تصحى
-----------
استاذة / الشيماء صلاح*shosho* مفيش مشاكل في موضوع التأخير ، وربنا يوفقك في الامتحانات
شكرا ع المجاملة اللطيفة
---------
أستاذه / صفـــــاء
هو فعلا الاضراب فشل والناس راحت شغلها عادي
شكرا لتعليقك
-----------
محمد مارو
شكرا ع التعليق ويكفينا شرف المحاولة