السبت، أكتوبر 25، 2008

انضم للفريق الكسبان


بما أني المدونة اسمها وحي القلم ( من أجل التغيير) فيبقي لازم نتكلم عن الموضوع ده شوية
بداية إحنا كلنا – كمصريين – نسعى للتغيير ومش عاجبنا الأوضاع اللي البلد عليها اليومين دول – ولا في حد عاجبه الوضع ده - ؟!
ولما بحثت في الشارع شوية لقيت إن الناس كلهم بيسعوا للتغيير بس كل واحد ليه طريقته ومنهجه اللي ماشي بيه ووسائله اللي بيغيير من خلالها .!
حاولت اني احصر الطرق والمناهج والوسائل اللي الناس بتعملها علشان تحقق التغيير والإصلاح علشان البلد دي!
وفي 3 فرق بيسعوا للتغيير
ودا عرض للفرق التلاتة اللي ترشحوا واللي موجودين فعلا في الحقيقة .
الفريق الأول :- اللي شايف إن التغيير هيجي من القاع إلي القمة
- يعني ببساطة أكتر- شايف إن التغيير يبدأ من داخلنا إحنا وبينتهجوا المنهج السلمي اللي الرسول – صلي الله عليه وسلم – انتهجه وهو إن الشعب كله يسعى للتغيير ويعيش حياته كلها علشان كده وكمان يكون مستعد للحياة بعد التغيير ولا ينسي ان دا فضل ومنة من ربنا – ودا تقريبا منهج الإخوان المسلمين - .
أما الفريق الثاني :- فهو الفريق اللي شايف إن التغيير هيبقي عن طريق الثورة أو انقلاب أو حاجة زى كده - ودول تلاقيهم معلقين صور لجيفارا - ويقولوا إن لو الرئيس والحكومة دول اتشالوا وجه غيرهم يبقي كده هتبقي مصر احلي والوضع هيتحسن .
الفريق الثالث :- اللي يرضه يسعى للتغيير – تصور- بس خايف حبتين علشان كده بيتمني إن التغيير يحصل بس مايروحش أقسام وما يتبهدلش ورافعين شعارات أمثال "أنا مالي " " يعني أنا اللي هاغير الكون ""أنا ماشي جنب الحيط " – مع اني في ناس ماشية جوا الحيط مش بس جنبه – وغير ذلك
ودول أضعف الإيمان والتغيير في الغالب مش شاغل بالهم كتير .
تقريبا دي الفرق اللي أنا شايف إنهم بينتموا لفئات الشعب المصري
وأنت عزيزي القارئ بتنتمي لأي فريق في الفرق دي ؟!
الأول ولا ّ الثاني ولا ّ الثالث ولا ّ فريق رابع لم أذكره .!!
وباتمني لكل زوار وقراء المدونة إنهم يختاروا فريق من الفرق دي وطبعا أنت مش مفروض عليك حاجة ولا فيه فريق معين إنا بأرشحه لك.
--------------------------------------------------------------
نفسي أشوف تعليقاتكم وآرائكم علشان نتعرف سويا
مين الفريق اللي هيكسب وهيكسّب مصر كلها ويوصلها – مش لكأس العالم – لان تكون أستاذة العالم وتكون الديمقراطية موجودة في البلد دي بجد.
اكتب تعليقك واختار فريق من الفرق دي .
وكل دا من أجل هدف واحد كلنا بنتفق عليه وهو التغيير والإصلاح.
وجزاكم الله خيرا

هناك تعليقان (2):

مصعب صلاح يقول...

ايه يا جماعة هو مفيش حد عجبه اي فريق
ولا عاجبه حاجة خالص
ارجوا المشاركة لاني حزين من عدم التواصل هذا

بحب كل الناس يقول...

ولا تزعل ياعم مصعب

انا طبعا مع الفريق الاول اللى لازم يغير من نفسه اولا فتكون هذه هى البداية الصح تمت بقى الفرق التانية ديه بيبقى معظمها لمصالح وغالبا ما ينتهى بها الحال الى الفشل
.....
لك الف تحية على موضعك

و منتظرك تنور مدونتى
دمت بكل خير